غربة

رسالة من مغتربة تعود لسوريا وتتحدث عن تجربتها

رسالة من مغتربة تعود لسوريا وتتحدث عن تجربتها

رسالة سيدة سورية مغتربة سافرت إلى سوريا شهر ... تحكي قصتها ...!!   

‏نزلت قضيت شهر بسوريا وياريت ما نزلت.

الحمدلله نحنا وضعنا ميسور و منقدر نشتري خبز ومازوت و بنزين و غاز حر ..

بس اقل مثال شفتو كان حدا من قرايبنا الي اوضاعو مو ميسورة لدرجة انو ما بيقدر يشتري شي بالحر و بدو ينطر دورو لياخد قنينة غاز كل 50 يوم. لما يخلص الغاز بعد 20 يوم اللي قنينة الغاز نصها ميّ ، رح يضطرو يطبخو على وجه الوجاق الي يادوب عم ‏يشتغل من قلة المازوت.

ولما ما يكون في مازوت او يكونو عم يوفرو بالمازوت بيوم مشمس يضطرو ينطرو الكهربا الي بتجي مرتين او مرة باليوم باوقات متقطعة

(ووضع الشام بالكهربا اهون من غيرا ) متل الريف بتجي مرة وحدة بالنهار ساعة يا اما باليومين او تلت أيام ساعة. ليطبخو طبختن.

عفكرة بعدني عم احكي عن شخص يعتبر اوضاعو ميسورة بالنسبة لاغلب الشعب السوري المعدوم.

‏حرفياً الناس ماشية بالشوارع، أجساد بلا روح

قصص كتير ما حدا بيسمع فيها من المغتربين، يمكن لينزل ويسمع ويشوف بعينو.

وأكيد لا المسؤولين ولا تجار الحر ب بيسمعو بهيك قصص ..!!؟

#في_ناس عم يرهنو هوياتن بافران الخبز منشان ياخدو ربطتين خبز بالدين!!!! ياكلو و يطعمو ولادن.

في ناس عم تبيع ضناها او يعطوه لناس يتبنوهم لان ما معو يطعموهن ...

في ناس عم تبيع أعضاء من جسمها ليصرفوا على أهليهم او يداوهن ...

في ناس عايشة ع الخبز الحاف وبأحسن احوالهم بياكلو بندورة مع الخبز بشكل يومي

في ناس عم تبيع أغراض بيتها لتعيش .. نعم عم تبيع أغراض بيتها وبابخث الأسعار حتى تكمل حياتها وتعيش

الغلاء حدث ولا حرج وخاصة المواد الأساسية غذائية خضار وفواكي، والفواكي صار حلم لأغلبية الناس واكترية الفواكه عم يتصدر برا سوريا تجار الحر ب وعلى عينك يا تاجر، والشعب مو ملاقي ياكل 

كيلو الزنجبيل ب 40 الف ليرة، كيلو الصنوبر 800 الف ليرة. يعني راتب موظف شهرين ما بجبلو أقل من 200 غرام،

مو ضروري يجيب صنوبر و زنجبيل" صحيح مو ضروري، بس ليش ما يجيب؟ شو بقل الشعب السوري عن باقي الشعوب ؟؟؟

التموين والرقابة كل يوم بدورو على المحلات لياخدو المعلوم والاتاوات وعادي قدام الناس ماعندهم مشكلة، الا اذا فيه كميرا للتلفزيون بيطبق القانون وبصيرو صارمين، دراما يعني وبس يروحوا بيعتذرو من بعض وبترجع العلاقات متل ما كانت ( حكلي لحكلك )...!!

الحواجز نفس الشي..!! كل حاجز عامل دولة لحالو ومو سائلين عن حدا، كمان أتاوات، وشو ما كان معك لازم يكون الهم حصة، من خضراوات أو فواكه او مواد غذائية وغيرها الكثير

هل الشي صار طبيعي عندهم والناس تعودت على هل الشي، ويلي ما معو يدفعلهن.. يا ويلو ويا سواد ليليو بلبسوه الف تهمة ، وخصوصاً إذا ما عجبهن شكلو او منظرو ..

والقائمة تطول... هي غير معاناة الطلاب والطالبات من المصاريف الخيالية وفساد أساتذة الجامعات ويلي بده ينجح باي مادة لازم يدفع مصاري واذا ما دفع بتدمر حياتو لا بيعرفوا اذا رسب دغري بيشحطوه ع الجيش ..

كتير قصص تدمي القلوب وبتبكي الحجر والصخور وما حدا سائل عن حدا ، صحيح نزلت شهر ع سوريا وياريت ما نزلت لأن المشاهد المأساوية ببلدي وأهل بلدي رح تضل عالقة بذاكرتي ورح تضل حسرة بقلبي طول عمري 

الله يفك عسيرها ويفرجها على هل الناس عن قريب يارب شي بوجع كتير 

google-news تابعوا آخر أخبار وكالة السوري الإخبارية عبر Google News

مقالات متعلقة

انهـيار حـاد تسجله الليرة السورية عند افتتاح يوم السبت

انهـيار حـاد تسجله الليرة السورية عند افتتاح يوم السبت

الليرة السورية تسجل انخفاضاً ملحوظاً عند افتتاح يوم الخميس

غسان جزماتي يؤكد أسعار الذهب ستسجل ارتفاعاً مستمراً

سعر صرف الليرة السورية عند افتتاح يوم الاربعاء

باسم ياخور ينـعي والده بكلمات مؤثـرة