الزواج حمل مانو سهل أبداَ.. وفي كتير مسؤوليات بس موضوع عدم الزواج وعدم الرغبة فيه أصلاَ برأيي صار بمستوى خطر.
بس آخر شهر قابلت كتير شباب رافضين فكرة الزواج كلها.. الأسوء إنو غالبيتهم ما عاد عندو رغبة.
قبل يومين سألت شب بعمر ال٣٠ عن مشاريعو المستقبلية.. حكالي عن الشغل والسفر وتكملة الدراسة.. سألتو عن الزواج قلي: ليش الزواج يعني.. ناقصني هم.
على الأقل في خمس شباب جاوبوني إنهن ما عاد يوثقوا بالبنات وهاد يلي خلاهم يلغوا الفكرة من راسهم.
وفي شب قلي أنا بفضل العلاقات العابرة.
برأيي جزء من يلي عم يصير بسبب القلق الكبير من المستقبل.. شو رح يصير ونحن وين رايحين.
ويعني عدم الاستقرار.
بس نحن إيمت كنا عايشين باستقرار؟
جوا سوريا مثلاَ لما كان الشب يتغرب نص عمرو و والنص التاني يجي زيارة متل الضيف ع بيتو ولا لما كان في قبلها حروب وانقلابات ما هديت.
نصيحة للشباب والبنات.. اختاروا بنت الحلال/ابن الحلال وتزوجوا.. اختاروا شريك/شريكة ترافقكن بهل المشوار يلي متل مانكن شايفينو صعب.
حبوا ونحبوا.. وخلو القصة كلها بسيطة.. لو كان في كل هالحسابات يلي إنتو مفكرين فيها.. ما كنتوا اجيتوا أصلاً.
اختاروا صح وانتبهوا للحركات والجمعيات يلي هدفها تكرهكم بالدنيا كلها مو بس بالزواج.. ولا تضلوا تسمعوا أخبار العمر بيخلص والأخبار السودا ما بتخلص.
متابعات
تابعوا آخر أخبار وكالة السوري الإخبارية عبر Google News